[店長英遊日記]巨石陣 巴斯羅馬浴場

PACHAMAMA

尋日行完倫敦市中心,約左個朋友吃了一頓秘魯菜(恕我當時出於禮儀冇好似港女咁相機食先,)。由於時差又係一返酒店就瞓到第二朝。

以前好鍾意plan行程,尤其店長以前做旅遊業,plan行程根本強項。但人生就係咁,一大咗就會開始從豐富追求簡單,喺自由行裡面參加咗當地的一日遊。

去到Victoria Station快快手喺站內買杯咖啡買件餅

朝早去到最集中的Victoria Coach Station,拎住早前喺香港Groupon訂嘅團購Coupon,登記後上咗兩層旅遊巴嘅上層開始出發。

車上有個導遊嘅伯伯喺車下層喺度講解,雖然佢好努力咁講,但係成車有一半以上係亞洲人,有啲中東,明顯唔係好識得聽英國式嘅幽默,來來去去都係得幾個人喺度笑。坐上層嘅連人樣都睇唔到就直頭google景點資料算。


大約坐咗兩個鐘頭到達第一個景點巨石陣Stonehenge,係公元前3000年已開始建造。考古學家話幾十件幾百噸重嘅石係由威爾斯運過嚟,足足有300幾公里遠,到底5000年前係點運過嚟,冇人知;點抬啲石整成橋,冇人知;起嚟實際做乜,冇人知;點樣建造,都冇人知。


最初我以為係召喚邪神之類嘅魔法陣,到後來先知考古學家話佢係用嚟睇時間。真係多謝曬,為左睇時間整堆石整左幾百年,如果真係咁,毫無疑問呢個一定係人類史第一個大白象工程。


喺草原上,有一班應該係小學生嘅坐喺微雨下浸濕嘅泥上面,拎起畫簿素描緊巨石陣。我哋個行程兩個半小時,班小朋友早過我哋嚟遲過我哋走,如果呢個情況發生在香港,我諗全校老師校長都會比家長照肺。


上返車後巴士往西北出發,一個小時去到巴斯(BATH)。呢個10萬人唔夠嘅城鎮最出名嘅景點,就係有超過100年歷史羅馬浴場。


一場去到就梗係入去見識下,講真15英鎊入場費就真係唔貴,但你話入去好令我大開眼界又講唔上,總之叫做到此一遊。反而同團見到有個黑皮膚女性一人獨遊,令我諗起以前我都鍾意自己一個獨自去玩,唔使理人吖嘛。但而家二人行將遇到嘅開心嘢所見所聞可以即時同身邊嘅人分享,好過下下都share facebook搏like啦。


行完浴場出嚟想食嘢,就比一陣香味吸引到。講真網絡推介固然好,但自己發掘都別有一番風味。呢間帳篷食店入面三個員工,一個文靜煎雞扒,一個豪邁大隻佬,加埋一個活潑世界女,夾份整又香又脆嘅香辣雞扒加薯條,配埋唔同嘅千島醬,我拎住個6英鎊嘅lunch box食嗰陣直排住長龍,食落真心好味!三個咁嘅組合,總係覺得佢哋會休息時會即刻開壇夾band,可惜食完到走都仲係密密做。


之後仲喺Bath嘅附近行,去到有靚景點就自拍一下,影影下有另一個黑妹子話幫我哋揸機,好有禮貌好友善,但係都係嗰句:影相呢門藝術真係唔係個個都識⋯⋯


行程完結返到倫敦,導遊伯伯同我哋講如果對佢服務滿意可以比Tips,老婆問我比佢好唔好,我話你鍾意就比5鎊銀啦開心錢冇所謂啦。架車返去Victoria落車嗰陣,導遊伯伯笑住咁喺車前同團友講byebye,見佢隻手揸住張50鎊同20鎊!大佬呀一日遊咋你做樣都做得make sense啲啦,揸下啲5鎊10鎊咪算囉6師弟。
跟住食埋嘢又完一日。

返到香港先貼返啲link。

廣告

發表迴響

Please log in using one of these methods to post your comment:

WordPress.com 標誌

您的留言將使用 WordPress.com 帳號。 登出 /  變更 )

Google+ photo

您的留言將使用 Google+ 帳號。 登出 /  變更 )

Twitter picture

您的留言將使用 Twitter 帳號。 登出 /  變更 )

Facebook照片

您的留言將使用 Facebook 帳號。 登出 /  變更 )

連結到 %s