好多謝阿媽當日打到我咁大

1454572315_f594
圖片來源:蘋果日報
我記得我細個嗰陣,家教好嚴,有咩唔啱就比阿媽用籐條捉住嚟打,打到手手腳腳都有籐條印。返幼稚園我記得高班嗰年可能我哋玩得太嘈,比老師叫晒我哋出班房門口,出晒去先一個一個咁叫返我哋入嚟,自此之後我哋就知道上堂時要專心聽老師話。

放假嘅時候喺屋企試過踢波射爆咗疊碗,又係比阿媽吊起嚟打,令到我知道踢波要去足球場。又試過因為想買嗰時好興嘅魔神英雄傳公仔(萬寧嗰陣賣$70一個,細個零用得$2一日)而第一次學偷阿媽枱面啲錢去買,佢打我之前問我「呢隻公仔幾多錢一隻?」,我話「8蚊!」「我而家比80蚊你你走去買10隻返嚟!」阿媽一句就KO咗我,跟手就隨便手執一個膠衫架行我刑。就係咁又教曉我唔可以講大話或者講大話要自己兜得到,呢啲就係我嘅人生。

記得細個好鍾意偷偷哋走去屋企樓下間機舖玩街霸,每次都比阿媽捉返屋企打手板。到有一日打打吓機嘅時候比兩個大過我好多嘅人圍問我攞錢,我好驚,咁啱阿媽又嚟捉我嘅時候見到,捉住我隻手攬住我「做乜搞我個仔呀!你咪掂佢呀我同你死過呀!」雖然返到去都係比阿媽打,但係嗰次,我覺得冇咁痛,而之後隔咗好幾年都冇再去機舖。。。改咗去玩超任的舖頭,起碼冇金毛逗,安全啲。

我嘅人生煉歷基本上都係由痛駡、身教而走出嚟的,我諗好多80後都係同我差唔多,因為當年父母係知道我哋大咗如果做啲咁嘅事一樣會比人吊起嚟打,所以佢哋打咗我先,起碼唔會打死我。

而家啲家長次次都話「細路仔係咁架啦!」「我打佢陣間又話我虐兒呀!」嚟去掩飾自己嘅管教不善。就算係個細路唔知道咩係錯,父母嘅責任就係用自己嘅方法令個細路知道咁樣做係錯囉。假如我帶個小朋友出去佢做錯事,就算我阻止唔到佢控制唔到佢,我都會識得代佢為被騷擾到嘅人講聲唔好意思啦,呢個都係阿媽教落嘅。

突然呢刻,反而好多謝阿媽當日打大我,多謝。

廣告

發表迴響

Please log in using one of these methods to post your comment:

WordPress.com 標誌

您的留言將使用 WordPress.com 帳號。 登出 /  變更 )

Google+ photo

您的留言將使用 Google+ 帳號。 登出 /  變更 )

Twitter picture

您的留言將使用 Twitter 帳號。 登出 /  變更 )

Facebook照片

您的留言將使用 Facebook 帳號。 登出 /  變更 )

連結到 %s